Castelo de Soutomaior

 

Tras ser un éxito en anos anteriores, repetimos estas actividades para afondar na nosa relación co alén, algo que está dentro da campaña “Orixe Rías Baixas” e das actividades “Mouras e meigas no castelo de Soutomaior”, que poñen en valor o noso patrimonio inmaterial. Esas lendas e contos, que se transmitiron ao longo de séculos de tradición oral, fálannos de seres mitolóxicos e dun máis alá que se achega a nós en outono, cando os días se fan máis fríos e curtos.

No castelo contaremos con dúas modalidades de visitas teatralizadas, ambas as dúas realizadas por Troula Animación, para adaptarnos a calquera tipo de público que queira pasalo ben pasándoo mal.

As primeiras visitas teatralizadas están destinadas a un público de todas as idades, o cal poderá gozar dunha historia terrorificamente divertida. Haberá un total de dezaseis pases, que terán lugar todos os sábados e domingos de outubro, a partir do día 7, en dúas sesións: a de mañá ás 11:30 h e a de tarde ás 16:30 h.

Cando caia a noite será a quenda do público adulto, que porá a proba a súa valentía nunha visita guiada onde nada é o que parece. Estas actividades, recomendadas a partir dos 16 anos, terán lugar todos os venres e sábados de outubro ás 20 h.

As entradas para estas actividades estarán á venda en www.castelodesoutomaior.com e custarán 8 € por persoa.