1 Camellia japonica. Camelia monumental do século XIX

 

Cando a Deputación de Pontevedra adquiriu o castelo e o seu predio o parque botánico contaba con 19 exemplares de camelia, que se atopan entre os máis antigos de Galicia. Entre eles destaca a camelia monumental, o exemplar desta especie co maior perímetro de tronco de Galicia e cun diámetro de copa de 15 metros.

A súa flor é dobre formal e de tres cores: branca, ocasionalmente con marcas rosas; rosa clara con veas máis escuras e a marxe dos pétalos en branco; e completamente rosas.

3 Camellia japonica ‘María Eugenia de Montijo’

 

Este cultivar foi obtido por Diego Maciñeira a mediados do século XX. Nomeouse en honra de Eugenia de Montijo, aristócrata española do século XIX e emperatriz consorte do pobo francés como esposa de Napoleón III, pola súa relevancia e influencia na moda de principios dos anos 60.

A súa imaxe correspóndese coa da flor típica da camelia: de tamaño medio, cor vermella intensa, dobre formal, con numerosos pétalos perfectamente imbricados e de floración abundante. Forma parte da colección do castelo desde o ano 1986.

4 Camellia japonica ‘Sangue de Pichón’

 

O castelo conta con tres exemplares deste cultivar de orixe galega, obtido por Diego Maciñeira en Torre de Lama, Mañón, A Coruña.

A flor, con forma de anemone, é de tamaño medio e alcanza uns 9 cm de diámetro. Destaca pola súa cor, entre vermella intensa e granate.

5 Camellia japonica ‘Alba Plena’

 

A colección do castelo de Soutomaior conta con varios exemplares desta variedade de camelia, a favorita de Coco Chanel, que mesmo a utilizou como imaxe da súa marca, polo que esta é unha das camelias máis recoñecidas a nivel mundial. Foi un dos primeiros cultivares introducidos en Europa. A súa flor é branca, dobre completa formal, de tamaño medio a grande.

7 Camellia sinensis

 

A C. sinensis florece cara a finais do mes de agosto, con flores pequenas simples e brancas, pero o máis destacable desta planta é a súa folla, utilizada para a produción de té.

En Soutomaior existe un exemplar na zona axardinada xunto ao edificio de apeiros.

6 Camellia japonica ‘María Vinyals’

 

Trátase dunha flor dobre formal de cor vermella coa que se inaugurou, en marzo de 2020, o xardín de camelias con nome de muller.

Este cultivar é unha homenaxe a María Vinyals, destacada activista social e pioneira do feminismo en España, que tamén deixou a súa pegada na historia con traballos en diversos ámbitos. Entre outras obras, é autora do primeiro ensaio sobre a historia do lugar no que naceu, o castelo de Soutomaior, da novela Rebelión e de múltiples artigos xornalísticos.

 

8 Camellia wabisuke ‘Tarôkaja’

 

A especie Wabisuke designa un grupo de híbridos procedentes de Xapón de orixe moi antiga. A flor é olorosa, de cor rosa, tamaño medio e forma simple. A maior representante da especie neste espazo ten algo máis de 30 anos e atópase xunto ao edificio de apeiros.

2 Camellia reticulata ‘Dr. Clifford Parks’

 

A especie foi creada polo Dr. Clifford Parks, en Carolina do Norte en 1970, e entrou a formar parte da colección de Soutomaior en 1986. A C. reticulata caracterízase pola súa flor grande de forma semidobre, aínda que pode variar a peonía, e mesmo a anemone, e a súa cor é vermella alaranxada.

9 Camellia sasanqua ‘Rosea’

 

Destaca polas súas flores olorosas, de forma simple, tamaño medio e cor rosa. Esta especie é tamén valorada polas súas sementes, utilizadas para a elaboración de aceites.

A colección do castelo conta con varios exemplares de C. sasanqua, que anuncia a chegada do outono, pois comeza a florecer a finais de verán.

10 Camellia x williamsii ‘Jury's Yellow’

 

Esta variedade foi creada por L. Jury en New Plymouth, Nova Zelandia.

O parque botánico conta con dous exemplares próximos á fonte da Marquesa. A súa flor presenta forma de anemone, é de tamaño medio e cor amarela crema.